WASE 3

Ena rawa beka vakaevei na veivinakati kei na Kalou?

H. L. Heijkoop

E ka marautaki vakalevu vei au niu rogoca ni ko sa ciqoma ka vakadinadinataka na nomui valavala ca.  Kevaka ko rairai ena mata ni Kalou ena gauna sara ga oqo, e dua ko beka ko iko ko sa okati sara tu ga me ko biu ki na rusa tawa mudu.  E dina beka ko sa vakatusa na nomu I valavala ca, ia ko sa sega tikoga ni vakadeitaka e lomamu ni sa bokoci na nomui valavala ca.  Ko kaya lo tiko e lomamu, "sai koya beka na veivutuni e gadreva na Kalou oqo se na veisau beka e gadreva vei au na Kalou oqo"?

Na mataqali vakanananu vaka oya e tu kece tu vei keda.  Ena gauna au sa qai tubu cake tiko mai kina, au vakadinadinataka e lomaqu niu tamata I valavala ca.  Ena gauna koya au sega soti ni dau kauwaitaka vakalevu na vakanananu oqo, ia ena gauna kece au dau vakarau davo kina ena bogi, e dau tuburi au na rere levu niu dau vakasamataka, "kevaka au na mate ena bogi ni kua, au sa na lako sara tu ga ki na rusa tawa mudu".  Au sa dau tovolea meu vakatusa na noqu I valavala ca ka kerea na nona veivosoti na Kalou ni bera niu dau davo sobu ena vei bogi.  Ia sega soti ga ni dau vakadinata niu sa vosoti.  E vaka e vakatitiqa voli ga na lomaqu. E sega soti niu dau vakacegu.  Ena dua na siga e kaya vei na ganequ ni sa kunea na vakacegu ni Kalou, au mani taroga se kunea vakacava, ia au mani vakayacora na ka kece sara e kaya vei au, ia e sega ga ni sa dua na vakacegu e sa yaco vei au.

E nai ka tinikavitu ni yabaki ni noqu bula, au a dabe toka ena dela ni noqu I davodavo ena dua na siga ka qai tarai au e dua na yalolailai levu kau kaya lo "na masumasu au dau vakayacora e tawa yaga wale kecega.  Ena vei yabaki sa oti au dau tagi vua na kalou me vakabulai au, ia e sega ni sa dua ga na veisau e vakadeitaki ki lomaqu".  Ia nai Vola Tabu e dusia tu ni "kevaka eda sa vakatusa na nodai valavala ca, sa yalodina ka yalododonu ko koya me bokoca na nodai valavala ca ka vakasavasavataki keda mai na ka kecega sa sega ni dodonu".  (1Joni 1:9)  E dina taucoko na tiki ni vola tabu oqo ni Kalou e sega ni dau vosa lasu.  Na nona vosa ni yalayala e sega vakadua ni rawa ni vakacalai.  Mai na tiki ni gauna koya e vosa saraga kina vei au na Kalou ka vakaibalebaletaka dina vei au na tiki ni vola tabu mai 1Joni 1:9.  E kenai balebale ni Kalou ea sa vosoti au ga enai matai ni gauna au sa vakatusai au kina vua.  Ena gauna vata koya e tarai au kina e dua na vakacegu levu.  Mai na tiki ni siga koya me lako yani, au sa qai kila tu ni Kalou esa vosota na noqu I valavala ca me vaka na nona vosa ni yalayala me yacova tiko mai na gauna oqo.  Mai na tiki ni siga koya e oti vakadua na vakatitiqa se yavalati ni lomaqu niu sa qai kila na Kalou sa vosoti ga enai matai ni gauna au vakatusai au kina Vua.

Na vakatagedegede ni veivutuni cava e gadrevi vei keda?

Na cava e taura kina e vicasagavulu na yabaki qai yaco kina vei au na vakacegu?  Na vuna na kena vakatitiqa na lomaqu.  Na vakatitiqa ni lomada e meca levu duadua ni noda torova yani na Kalou.  Na Kalou e sega ni wasea se mataqali vakatagedegede cava ni veivutuni me da vakayacora me qai vosoti keda kina.  Ena gauna ga sa vakila kina na nona cala kei na nonai valavala ca e dua na tamata mai na matai ni gauna, sai koya sara ga koya na ka e gadreva na Kalou.  E sega tale ni dua na ka ena vakatautauvatani mai matai ni gauna e veivutunitaka kina nona i valavala ca e dua na tamata.

E dau taleitaka na Kalou kevaka e dikevi koya na tamata mai nai valavala ca ni bula e vesuki tu kina ka me qai veivutunitaka.  Na levu ga ni noda dikevi keda ena veisiga, na kena vinaka ki na noda bula vakayalo.  Na levu ga ni noda vakasamataka nai sau ni valavala ca, na cecere ni noda na gadreva me da biuta laivi kece kina na vei tovo vakayago.  E da na vakila talega na reki kei na vakacegu dina o koya sa mai vua na Kalou.  E cakacaka ni Yalo Tabu sai koya me vakauqeta na yalo ni tamata I valavla ca me kila na loma ni Kalou.  E kea e sa na qai dikevi koya na tamata mai na lolovira ni bula e tu kina vata kei na veilewai levu ni Kalou sa waraki koya tu mai. 

Na vu ni noqu leqa sai koya niu a raici au tikoga, kau a sega ni raica na Kalou.  E dodonu meu a vakarorogo ka vakadeitaka na vosa ni Kalou ki na noqu bula.  Baleta na vosa ni Kalou e matata vinaka tu ni kaya, "kevaka eda sa vakatusa na nadai valavala ca, sa yalodina ka yalododonu ko koya me bokoca na nodai valavala ca .".  Na vu ni noqu leqa baleta niu a via raica saraga e dua nai vakadinadiana ni kena sa bokoci na noqui valavala ca ka sega niu a ciqoma ena dela ni vakabauta.  Sa ka bibi ki vei keda me da vakabauta na vosa bula ni Kalou baleta sai koya duadua ga na vosa oqo ena vakadeitaka ki vei keda na vakacegu ena gauna eda tugana kina ki lomada.

Na nona yalododonu na Kalou

Na loloma levu ni Kalou e sega ni rawa ni cakacaka ena taudaku ni nona lewa dodonu kei na nona yalododonu.  Oya e dua na ka sa rui totoka kina na kosipeli ni Kalou.  Na Kalou vata ga ka na vakayacora na nona veilewai levu ena dela ni nona dodonu sai koya talega na kalou oqo ka vakayacora tiko ena gauna edaidai na nona veivosoti kei na veivakasavasavataki ena dela ni nona dodonu, io, vei ira ga era veivutuni ka ciqomi Jisu Karisito ki na nodra bula me nodra Turaga kai Vakabula.  "Ni sa vakatakilai kina ni sa vakadonui ira na Kalou e na vakabauta me ra sa vakabauta" (Roma 1:17).  E kaya talega  "io me vakatakilai ena gauna oqo na nona yalododonu me sa dodonu ko koya, ka vakadonui koya sa vakabauti Jisu" (Roma 3:26).

Na veivakadonui

Na Kalou ena rawa walega ni cakacaka me veitaudonui kei na nona lewa dodonu ka savasava.  Kevaka me a sega ni mate ena kauvelatai na Karisito mei soro ni nodai valavala ca, ke a sega na nodai nuinui na tamata I valavala ca.  Na loloma walega ni Kalou e rawa ni da vakabulai  kina mai na rusa tawa mudu.  E a sega ni dodonu me vaka kina baleta na nona lewa dodonu sa kilikili kina kivei keda na tamata I valavala ca me da rusa.  Na loloma walega ni Kalou sa rawa ni da vueti tani mai kina ena rusa tawa mudu.  Na loloma ni Kalou erau na sala vata tikoga kei na nona yalododonu kei na nona lewa savasava.

E rawa ni da wilika eso na nonai tuvatuva cecere na Kalou ena Iperiu 10, kei na Same wase 40 kei na vuqa tale.  Nai naki ni Kalou sai koya me vakabulai keda mai na noda i valavala ca. (1Timoci 2:4).  E a sucu vakatamata na gone Turaga ko Jisu Karisito ka a qai kaya  "Au lako ga mai meu mai vakayacora na lomai tamaqu sa tiko mai lomalagi", mani yaco sara me rube ena kauvelatai me vakadeitaka kina na soro ni valavala ca ni kai vuraura kecega.  E a vakacolati vua na nodai valavala ca ka yaco me tau vua na lewa dodonu ni Kalou ena vukuda.  Na cudru ni Kalou ea tau ena vuku i Jisu Karisito mai Kalivari e sa veituri vinaka sara ga kei na nona i tuvatuva cecere na Kalou.  Ia na cudru ni Kalou e sega ni colata na Turaga baleta ni dodonu me vakakina, e segai.  Na Turaga ko Jisu e sega vua nai valavala ca.  Ko Jisu e dua e sinai vua na dina kei na savasava.  E mai yaco walega me kedai sosomi baleta ena gadrevi walega e dua e sega vua na cala me kedai soro ka me qai yaco me ra vakabulai ena vukuna ko ira yadua era vakabauti koya.

Sa qai rawa ni kaya na Kalou ki nai taba tamata i valavala ca oqo, "mo dou veivinakati kei na Kalou" (2 Korinica 5:20).  E sega walega ni loloma ni Kalou, ia na nona lewa dodonu sara talega.  Sa kilikili gona kina vei keda kece sara na tamata i valavala ca meda vakabauti Jisu Karisito me rawa ni da veivinakati tale kina kei na Kalou.

Na tucake tale mai na mate sai vakadinadina ni nona yalododonu na Kalou

Na turaga ko Jisu e colata na nodai valavala ca ena yagona ena kauvelatai me yaco vei ira era na ciqomi koya me nodrai vakabula vakatalega kina vei ira era na qai muri mai. (1 Pita 2:24).  Sa mai okati vua me i valavala ca me rawa ni lewai kina ena vukuda (2Korinica 5:21); (Roma 8:3).  "Ni sa sau ni valavala ca na mate" (Roma 6:23) kei na "tawasei ni tamata mai vua na Kalou" (Vakatakila 20:14-15).  Sa vosota oti na veika kece oqo ena kauvelatai na Turaga ko Jisu ka yaco sara me mate.  Sa qai cavuta e muri na vosa "Sa oti" ni sa rawata na qaqa.

E a rawa beka ni tikoga e loma ni bulubulu na Turaga ena gauna sa vakayacora oti kina na cakacaka ni veisorosorovi?  Na nona yalododonu na Kalou o koya ka mai colata kina na luvena nai totogi ka sa lewa vakatalega kina me sereki mai na mate ka me tucake tale.  Oya baleta ni sa qaravi oti nai tavi ni veisorosorovi.  Na cudru ni Kalou sa vakayacori ena vuku I Jisu ena dela ni nona yalododonu kei na nona yalosavasava.  (Sa qisi Karisito ko koya ka vakaturi koya cake tale mai na mate" (Efeso 1:20).  Sa mai vakadinadinataki e vuravura taucoko vakakina vei keda kece sara na tamata eda bula tiko ena gauna edaidai na dina levu oqo ka sa dredre kina me dua e vakacala. (Joni 16:8;10). 

Kevaka me a sega ni tucake tale mai na mate na Karisito, ke a vakatakilakila oya ni sa bera ni oti na cakacaka ni veisorovi.  Kevaka talega sa sega ni dua na nodai nuinui na tamata. (1Korinica 15:17-18).  E da rawa ni raica eke ni tucake tale mai na mate e usutu ni tukutuku vinaka.  Vei ira era via vakacala na dina levu oqo sai ira oqo era na vakatawayagataka nai tukutuku vinaka i Jisu Karisito.  E kaya na Roma 4:25 "o koya sa soli yani ena vuku ni nodai valacala ca, a sa vakaturi cake tale me da vakadonui kina".

Ena gauna ni loloma eda tu kina oqo, sa dusia vakamatata tu vei keda kece sara na tamata ko koya "ni sai valavala ca ko ira kecega na tamata ka sa sega ni yacova na ka e vakarokorokotaki kina na Kalou".  E kaya tale "a ra sa vakadonui walega ena nona loloma ni sa volia na bula ko Jisu Karisito.  O koya sa lesia na Kalou mei bulubulu vei ira sa vakabauta, ena nona dra." (Roma 3:23-25).

Oqo nai tukutuku kivei "keda kece sara" ka vakauasivi vei ira era vakabauta (Roma 3:22).  Sa kenai balebale kivei ira kece era ciqoma na kaci ni Kalou ka ra vakadinadinataka ni ra tamata i valavala ca, ka yaco me ra ciqomi Jisu Karisito ki na nodra bula.  Ena gauna oqo sa dodonu me cakacaka na Yalo Tabu ki na nomu bula me rawa ni ko vakadinadinataka kina na nomu i valavala ca.  Lako vua na Kalou, kaya vua na vei caka cala kece sara ko sa vakayacora.  Sa na qai dusimaki iko na Kalou vei Jisu Karisito ka kaya ," e mai mate ena vukudra nai valavala ca, kevaka ko vakabauti koya, au na vakabulai iko ena vukuna".  Ciqomi Jisu ki na nomu bula.  Vakadinata ni dina na vosa ni Kalou ka sa bokoca oti na nomu I valavala ca.  Veitalia kevaka e vakatitiqa tiko na lomamu ena gauna oqo.  Na ka ga e bibi sai koya na vosa ni Kalou e dina ka dodonu.  Ena gauna e lako voli kina na Kalou mai Ijipita me yaviti ira na nodra ulumatua ena gauna ni kana vata ni lako sivia, e a lako sivita na vei vale ka raica kina na dra ena ulu ni katuba me vaka sa vakaroti ira oti kina na Isireli.  (Lako yani 12).  E veitalia sara kevaka e tu na veiulumatua ena veivale oya, ena sega ni veisautaka e dua na ka baleta era na vakabulai dina ga ni sa tiko nai vakatakilakila ni dra ena ulu ni katuba.  Kevaka era vakayacora na ka e gadreva vei ira na Kalou, sai koya ga oya nai tinitini ni ka kece.  Kevaka e via vakacegu na lomadra na Isireli, ia me ra vakayacora ka vakadinata na veika sa vakarota vei ira na Kalou beleta sa vosa oti kina na Kalou ka sa dodonu me ra tugana ga ki lomadra ni sa dina na vosa koya. Sa kena i balebale ni kevaka sa vakarota vei keda na Kalou e dua na ka me da cakava me rawa ni da bula kina, sa dodonu me da cakava ka vakabauta ni da na bula dina kina.

Na  veika kece oqo sai koya me vakarokorokotaki duadua ga kina na Kalou.  Eda rawa ni raica votu eke na nona yalololoma levu na Kalou.  Ia, e sega walega ni o koya oqo.  Ena gauna eda lako mai kina vua na Kalou ena vuku i Jisu Karisito, sa na qai okata vua na Kalou na cakacaka sa vakayacora oti ko Jisu ena vukuna me rawa ni da vakadonui kina.  Me vaka sa colata oti ko Jisu nai sau ni valavala ca ena kauvelatai, sa qai raici ira na tamata vakabauta na Kalou me vaka saraga e a sega ni ra caka cala ka me ra cudruvi kina.  Na lewa dodonu ni Kalou o koya e vakadonuya ka sereki keda kina mai na nona veicudruvi levu.  Na nona yalodina kei na nona yalododonu duaduaga na Kalou e kune ena i tuvatuva oqo baleta sa vosa ni yalayala oti kina ko Koya.  Sa dina gona kina na tiki ni vola tabu ni 1Joni 1:9 ka kaya vakaoqo,  "ni Kalou e yalodina ka yalododonu me bokoca noda i valavala ca ka vakasavasavataki keda mai na ka kecega sa sega ni dodonu".

 

Na Kalou e kila vakavinaka na kedai tuvaki

Ko na vakila sara vakalevu ki na nomu bula na kedrau duidui bula makawa kei na bula vou me vakatautauvatani mai na gauna ko sa bera ni vakabulai kina.  Oqori na cakacaka ni Yalo Tabu ki na nomu bula baleta sa dolava na katuba ni yalomu.  E kila vakavinaka na yalomu kei na lomamu kei nai valavala ni bula ko sa vakayacora oti kei koya ko sa bera ni vakayacora.  E kila vinaka na Yalo Tabu nomu i tuvatuva ni bula ka dredre mo na kila rawa.  Na nona loloma kei na nona kauwaitaki keda na Kalou e vakaraitaki ena gauna sara ga eda valavala ca tu kina ka vesuki tu kina na noda bula ena talaidredre, lasa vakavuravura, veileti, veiqati, veileti vakavuravura, veivuvutaki (Taitusi 3:3-4), mai mate Karisito ena vukuda me rawa ni da bula kina.  Sa rui cecere na nona loloma Kalou vei keda baleta gauna saraga eda luvuci tu kina ena i valavala ca, mai mate ena vukuda ko Karisito. oi keda na meca ni Kalou eda sa vakaveiwekanitaki tale kei na Kalou. (Roma 5:6-10 kei na 2Korinica 5:20).

Eda sa qai veivinakati kei na Kalou

E kaya na nona vosa ni sa rawa ni da veivinakati kaya na Kalou ena vuku ni da sa vakabauta na dra talei ni gone Turaga ko Jisu Karisito (Roma 3:23-25).  E kaya ni da na vagalalataki mai na valavala ca kecega ena gauna eda lako mai kina vua.  Sa na qai okati me da valavala dodonu ena vuku i Jisu Karisito.  Sa sega tale ni dua na ka eda beitaki kina ena gauna eda vakatusa kina na noda i valavala ca Vua.  Eda sa vagalalataki ena vei cala kecega eso, sa sega tale ni dua na ka e tiko me tawasei iko mai vua na Kalou ena gauna ko lako mai kina vua ka kere veivosoti.

Na cava ga e sa sega tiko kina ni yaco vei au na vakacegu?  Na veivinakati kei na Kalou sai koya ni sa sega tale ni dua na ka e beitaki iko kina.  Sa vakadonui iko ko koya ena gauna ko vakabauti Jisu Karisito kina me nomu i vakabula (Roma 5:1; Iperiu 9:12).  Sa sega tale ni dua na ka e koto ena kemu maliwa kei na Kalou baleta ni ko sa veivinakati kaya na Kalou (2Korinica 5:20). Sa rawa na veivinakati kei na Kalou! (Roma 5:1) e kaya koto vakaoqo, "O koya oqo, ni da sa vakadonui ena vakabauta, me da sa qai veivinakati kei na kalou.."

Ia na cava ga e sa sega tiko kina ni vakacegu na lomaqu?

Ia na lomamu e sa tukuna tikoga vei iko ni ko sa bera ni vosoti.  Ena rawa ni yaco oqo kevaka e vakatitiqa voliga na lomamu.  Ko Jisu e sa vakayacora oti na cakacaka ni veivakavoui kei na veivinakati.  Sai koya na vu-ni noda veisorovi.  Sa yalataka oti vei keda na nona vakacegu.  (Efeso 2:14.16.17; Kolosa 1:20).  "Ni sa ia mada na ka ni veivinakati ena nona dra ni sa lauvako ki na kauveilatai."  Ena gauna ko ciqomi Jisu kina, ko sa vakaivotavota ena vakacegu oqo.  Sa dodonu mo vakabauta kevaka ko na via vakadinadinataka ki na nomu bula na dina levu oqo.  Ko rawa walega ni kunea na vakacegu ni Kalou ena gauna ko vakadeitaka ki na ki lomamu na vosa bula ni Kalou.  Baleta na vakacegu e rawa duaduaga ena vakabauta kei na noda veiwekani kaya na Kalou.

Na vu levu duadua ga ni nomu sega tiko ni sa vakila na vakacegu baleta ni ko sa sega ni se vakadeitaka ki lomamu na Vosa ni Kalou.  Qo e dua na ka ena vakatarabetaki keda sara vakalevu.  E dua na ka e beci e mata ni Kalou oya na nomu sega ni vakabauta na nona Vosa.  E kaya nona vosa "Sa sega ni tamata na Kalou, me mai vosa lasu ko koya" (Tiko mai na Lekutu 23:19).

Ena gauna vata ga ko vakabauta kina e lomamu na vosa ni Kalou, sa rawa ni yaco mo vakavinavinaka vua ena vuku ni veika cecere e sa mai vakayacora oti ena vukumu.  Ko na vakila talega na vakacegu levu ni Kalou ni sobuti iko.  Na vakanananu vakatamata sai koya me da dau raica e liu ka qai vakabauta e muri, ia na Kalou e kaya vakabauta e liu ko na qai raica e muri.  Tugana ki lomamu na nona Vosa ka vakadeitaka sara ki na vu ni yalomu mai loma.

Me nomuni na vakacegu.

H. L. Heijkoop

Translted by Sekaia Mara, Nabua, Suva, Fiji Islands

Search the Scriptures, P.O. Box 583, Werribee, VIC 3030 Australia

Bible Distributors, Fountain House, Conduit Mews,

London, SE18 7AP UK, 2003 - used by permission

Copyright © Biblecentre.org :: Free for personal use
Publication only with prior permision from Biblecentre