WASE 1

E dodonu beka me sucu vou tale na tamata se me ia na veivutuni?

E ka marautaki vei au meu goleva mada na ulutaga bibi oqo. Dau rogoci wasoma na ulutaga oqo ni dau veitalanoataki ka vunautaki talega ena veivanua eso ia, e lewe vuqa era dau loma tarotarotaka tu na tikina oqo.  Ke ko iko beka e dua ko vuli vinaka se cakacaka vinaka ka sa yaco mo sa rawa ka vinaka sara, ia ko sa vakanuinui tu ni na  dua na gauna mo taura kina e dua nai tutu toro cake.  Ko sa raica na veika sa yaco tiko ena nomu bula ko sa kaya lo sara e lomamu se veivutuni cava tale au gadreva ki na noqu bula?  A cava tale e gadrevi kina na veisau?

E vuqa na tamata e nodra cakacaka ena veisiga na soli vakasala vinaka se me ia na veivakadodonutaki ena nodra bula na tamata eso.  E dua na ka vaka mosi yalo na veivakasala vaka oqo vakauasivi ena gauna e tara kina na lomada na dina ni vosa vakaoqo.

Sa ka e bibi mo dikeva se dina nai tukutuku oqo se segai?  E kililiki beka vei au me ia na veivakavoui?  Na ulutaga oqo e umani vata koto kina na taro ni nona vakadeitaki koya e dua enai lakolako ka tarava ni cava na bula oqo.  E rui ka bibi mo vakadeitaki iko ena taro levu oqo ka raica deivaki na kena bibi ki na nomu bula.

E bau dua beka na gauna ko taroga lo tu e lomamu se cava nai cavacava ni bula oqo?  Au vakabauta ni na sega ni taucoko na noda loma tarotaro vakavo ena gauna eda sa yacova yani kina na bula oya.  E sega ni dua na ka kevaka me da vagoleya mada ga kina vakadua na noda vakanananu me rawa ni vakamataliataki kina ki vei keda na taro levu oqo.

Au nanuma e dua nai tukuni makawa ni dua na gone tagane.  Na Tui ni vanua oya e kacivi koya mai ka qai taroga se cava sara mada na balavu ni bula tawa mudu.  "Kemuni saka na Tui" e kaya cake yani na gone tagane oqo. " E na dua na vanua vakayawa e tiko voli kina e dua na ulunivanua cecere sara ka buli mai na varasa.  Na kena cecere e tara sara tu yani na dela ni O.  Ena vei yaduanadrau kece na yabaki e dau vuka mai e dua na manumanu me mai tokia vakadua ena gusuna na ulu ni vanua oqo. Sa yaco na gauna sa yavu sobu tiko kina vakamalua ena veigauna kece e yaco tiko kina na ka oqo ena vei yaduanadrau kece na yabaki ka yaco sara me seavu yani kina vakadua na ulu ni vanua  oqo. Kemuni saka na Tui, ena gauna e seavu kina na ulu ni vanua oqo, oya saka e sa qai dua na sekodi ni bula tawa mudu."

Nai sau ni taro ni gone tagane oqo e rawa ni solia vei keda e dua nai yaloyalo ni kena tawa vakaiyalayala na bula tawa mudu.  E dina ga ni sega ni dodonu nai sau ni taro oya baleta ni bula tawa mudu e sega kina na sekodi.  " Ni sa tautauvata vua na Turaga na siga kei na yabaki e dua na udolu, kei na yabaki e dua na udolu kei na siga e dua"  (2 Pita 3:8).  Na bula tawa mudu e sega ni vakaiyalayala ka sega talega ni wasei rawa na kena vei taba gauna.  E dua na ka e sega na kenai cavacava.

Nai talanoa oqo e da rawa ni vakaveiwekanitaka kina na balavu ni bula ena vuravura oqo kei na bula tawa mudu ka na lako tarava mai.  A cava na tini na yabaki, se limasagavulu, se walusagavulu, se mani dua na drau sara na yabaki me vakatautauvatani kei na bula tawa mudu.  E vakaevei, e sega beka ni bibi me da vulica ka kila na vanua e da na tini kina ni cava na bula oqo?  Au nanuma tale edua nai tukuni makawa.  Ena gauna ni veiliutaki vaka-Tui, e dau vuqa vei ira na Tui e dau tu na nodra dau ni veivakamarautaki. E dau nodrai tavi me ra dau talanoa lasa se soli vukivuki lasa me rawa ni ra vakadredrei kina na Tui. Ena dua na gauna sa solia kina e dua nai sala vei koya na nona tamata dauveivakalasai oqo.  E vakatokai nai sala oqo mei Sala ni lialia.  Qo me kilai tani kina ni ko koya e dau ni veivakalasai.  Sa qai yalataka na Tui ni kevaka e dua na gauna e na kune kina e dua e lasa cake mai vua na ka e cakava, me soli vua nai sala oya.  Sega ni dede sa mai tauvi mate na Tui ka sa davo bibi sara tu yani.  Sa sikovi koya sara na dau vakalasalasa oqo ka taroga na Tui se na bula vinaka tale mai ena tauvi mate ni naica.  Kaya cake yani na Tui ni sa vosa oti vua ko nona vuniwai ka sa sega ni dua na veisau e laurai rawa.  Ia me sa wawa mate ga.  Sa qai taro cake na dau vakalasalasa oqo, "Kemuni saka na Tui, ko ni sa vakarautaki kemuni tu beka ki nai lakolako balavu ka ko sa vakarau lakova yani oqori".  "E segai" sauma yani na Tui.  "Oqori e dua na leqa levu baleta niu sega sara tu ga ni vakasamataka tu na bula ka tarava"  Vosa tale na nona tamata, "E sega beka ni ko dau vakasamataka tu ni dua na siga ko na lakova kina nai lakolako balavu oqo".  Sauma tale na Tui, "Au kila vinaka tu, ia au a sega ga ni vakaogai au kina baleta ni tu tale eso na ka au a vakaogai au voli kina ena ka ni bula oqo."  Sa qai kaya cake tale na nona tamata, "Ena veigauna kece ko vakarau ia kina e dua nai lakolako balavu, sa dau tu na nomu tamata me ra vakarautaka na veika me baleta nai lakolako oqo me na kakua kina ni dua na leqa ko na sotava.  Ia me maravu na nomuni lakolako ki na vanua ko lako tiko kina. Ia, enai lakolako balavu tawa vakaicavacava ko sa vakarau vakanamata yani kina oqo, ko sega tu mada ga ni rawa ni vakarautaki iko rawa kina, Qo, taura na nomui sala ni lialia, baleta au sega soti sara ni lialia me vakataki iko."

E sega beka ni dina na tamata dauvakalasalasa oqo?  Vuqa na gauna eda sa vakaogai keda ka vakaosoosotaki keda tu ga ena ka ni bula oqo.  E da vakaogai keda vakalevu ena vuli kei na cakacaka me da rawa ka vinaka kina ka me da tiko vinaka kina ena bula oqo.  Kevaka eda sa rawa ni solia noda gauna levu vakaoya me rawa ni da tiko vinaka kina ena loma ni bula vakaicavacava oqo, A cava ga eda qai vakaweleweletaka kina na taro levu ka bibi sai koya "Ni cava na bula oqo e vei na vanua ko sa digitaka tu".  Dua na ka me da kila deivaki tiko ni noda bula ena vuravura oqo e vakaicavacava.  E rawa ni ko tauvimate ga ni kua ka ko leqa sara yani ka mai maumau wale tu yani na buno ni yadremu ena bula oqo.  Ia e dua na ka me da kila tiko ni dua nai lakolako tawa vakaicavacava e sa waraki keda tiko mai liu. "Ia me vaka sa lesi me mate vakadua ko ira kecega na tamata" (Iperiu 9:27).  E sega vakadua ni dua na tamata vakabauta na Kalou se sega ni vakabauta na Kalou me vakalasuya na tikina oqo.  E sega ni rawa ni dua e cakitaka rawa.  Na dina levu ni tiki ni vola Tabu oqo e semai toka e muri - "ka me qai muri na veilewai levu." 

E dua na ka vakaloloma kevaka eda sa kila na bibi ni bula tawa mudu ka da qai vakaweleweletaka.  E dina ni sa tu na noda veigauna sa lokuci tu me da na qai laki vakadinadinataka kina na ka oqo, e kea talega sa na sega ni rawa kina na veivutuni.  Na bula ga oqo e sa rawa kina ni da vakarautaki keda kina.  Sa dina kina na vosa ni dau vuku "Na yasana sa bale ga kina na kau, sai koya ena no ga kina." (Dauvunau 11:3).

Eso beka era na kaya "Io a cava so eda sa vakusakusataka"?  Vakacava ena gauna sara au sa na qase kina meu qai vakananuma na tikina oqo?  Gauna oqo au sa osooso ka sa tu nai tavi bibi meu sa qarava mada. 

Ko vakadeitaka rawa vakacava ni ko rawa ni bula tiko me limasagavulu na yabaki se tolusagavulu se tini se tinikarua na vula se mani tinikarua sara na aua.  Au nanuma e dua nai vakatawa ni sitoa, e vakarorogo tiko ga mai loma ni nona sitoa ni ia tiko na vunau e tautuba.  Gauna e cava kina na vunau e gole ga ki loma ni nona vale mani bale sobu ka mate sara yani.  Kakau ni volitaka na gauna, volia na gauna. 

Ena marautaka beka li na Kalou kevaka o bula tu vakavuravura ni ko tu donu tu ia qai laki solia tu vua na Kalou nai vovo ni nomu bula ni ko sa laki qase.  E dina ni Kalou e gadreva  "me bula na tamata kecega"  (1Timoci 2:4) ia e kacivi keda sara tu ga ena gauna saraga oqo.  E gadreva tu na Kalou  "me da veisorosorovi ka veivinakati kei na Kalou" (2 Korinica 5:20).  Na Kalou e vakabula e dua vei rau na tamata dau butako ena kauvelatai ka udolu vaka udolu na tamata era vakabulai ena nodrai davodavo ni tauvi mate.  Sega ni kenai balebale me da vakalaiva me yaco talega vei keda.  Ko sega tu ni kila na ka ena yaco vei iko ena siga ni mataka.  Edaidai ga oqo na siga ni bula.

E kaya na Jope 33 ni Kalou e dau vosa vei keda vakadua se vakarua, me vagolei keda tani kina mai na sala ni rusa, ia kevaka sa sega ni via vakarogoca, sa qai dregata na vosa ni veivakaro oqo.  Ena gauna sa sega kina ni via rogoca nai vakaro ni Kalou ko Fero, sa qai vakaukauwataka na yalona na Kalou me kakua kina ni rawa ni qai veisau na lomana.  Ena gauna ena kau cake kina nai soqosoqo lotu, sa na qai vakatara na Kalou me ia na veivakacalai mana eso vei ira kece era a rogoca nai tukutuku vinaka ka sega ni ciqoma. "me cudruvi kina ko ira kecega era sa sega ni vakabauta na ka dina, a ra vinakata ga na ka sa sega ni dodonu" (2 Cesalonaika 2:11-12).  E rawa saraga ni cakava vei iko na Kalou na ka oqo kevaka o iko o sa rogoca wasoma na nona vosa ka sega tiko ga ni via ciqoma na nona veisureti

Ia, na gauna ni lialia sa vakarota oti na Kalou; a sa vakarota ena gauna edaidai vei ira tamata kecega e na veivanua kecega me ra veivutuni ni sa lokuca ko koya na siga me lewai vuravura kina e na lewa dodonu, vei koya na tamata sa lesia ko koya; a sa vakadinadina kina vei ira na tamata kecega, ena nona vakaturi koya cake tale mai na mate"  (Cakacaka 17:30-31)

Kevaka esa lomamu dina na via bula, gole vua na Kalou ka vakatusa na nomu i valavala ca, qai kerei koya me vakabulai iko.  "Keitou sa yaco kina mei talatala nei Karisito, me vaka sa vakamasuti kemudou na Kalou e na gusu i keitou: Keitou nai sosomi kei Karisito, keitou sa vakamamasu, mo dou veivinakati kei na Kalou.  O koya sa sega vua na cala sa qisia ko koya mei soro ni nodai valavala ca;  me vakayacori kina vei keda na veivakadonui ni Kalou e na vukuna." (2 Korinica 5:20-21)

"E na siga oqo, kevaka dou sa via rogoca na domona, kakua ni vakaukauwataka na yalomudou" (Iperiu 4:7)

Me nomuni na bula vinaka.

H. L. Heijkoop

Translted by Sekaia Mara, Nabua, Suva, Fiji Islands

Search the Scriptures, P.O. Box 583, Werribee, VIC 3030 Australia

Bible Distributors, Fountain House,  Conduit Mews, London, SE18 7AP UK, 2003

Copyright © Biblecentre.org :: Free for personal use
Publication only with prior permision from Biblecentre